YANGI O‘QUV YILI TOSHKENT KIMYO XALQARO UNIVERSITETIDA TANTANALI RUHDA BOSHLANDI
Toshkent Kimyo xalqaro universitetida yangi o‘quv yilining ilk kuni ko‘tarinki ruhda boshlandi. Talabalarni kutib olish marosimi O‘zbekiston Respublikasi davlat mustaqilligining 35 yilligiga bag‘ishlanib, O‘zbekiston Respublikasi Mudofaa vazirligi harbiy orkestri ishtirokida tashkil etildi.
2026-yilda mamlakatimiz davlat mustaqilligining 35 yilligi “Yagona Vatan, yagona xalq bo‘lib, yangi hayot va kelajak yaratamiz!” ezgu g‘oyasi ostida keng nishonlanmoqda. Ushbu sana yosh avlod qalbida Vatanga muhabbat, milliy g‘urur va yurt kelajagiga daxldorlik tuyg‘ularini mustahkamlashda alohida ahamiyat kasb etadi.
Universitet hududida yangragan harbiy orkestr ijrosidagi kuy-qo‘shiqlar ilk o‘quv kuniga o‘zgacha ruh bag‘ishladi. Talabalar yangi bosqichni bayramona kayfiyatda, yangi maqsad va intilishlar bilan qarshi oldilar.
Bugungi talaba — ertangi kun mutaxassisi, ilm-fan, innovatsiya va jamiyat taraqqiyotining faol ishtirokchisi. Shu bois Toshkent Kimyo xalqaro universitetida talabalarning sifatli ta’lim olishi, zamonaviy bilim va amaliy ko‘nikmalarni egallashi, o‘z salohiyatini namoyon etishi uchun zarur imkoniyatlarni yaratishga alohida e’tibor qaratiladi.
Barcha talabalarimizga yangi o‘quv yilida muvaffaqiyat, yangi bilim va ulkan yutuqlar tilaymiz!
