Bolalar o‘ynayotganda ham o‘rganadi: AQShlik professor KIUTda zamonaviy ta’lim metodlari bilan tanishtirdi
Bola o‘yin davomida nafaqat vaqtini maroqli o‘tkazadi, balki fikrlashni, muammolarga yechim topishni va boshqalar bilan muloqot qilishni ham o‘rganadi. Xo‘sh, o‘yinni qanday qilib samarali ta’lim vositasiga aylantirish mumkin?
21-oktabr kuni Toshkent Kimyo xalqaro universitetida AQShning James Madison universiteti professori, PhD Shin Ji Kang ishtirokida tashkil etilgan amaliy seminarlar aynan shu savolga bag‘ishlandi.
Maktabgacha va boshlang‘ich ta’lim sohasida 20 yillik pedagogik va ilmiy tajribaga ega professor bo‘lajak o‘qituvchilar bilan zamonaviy ta’lim metodlari yuzasidan tajriba almashdi.
Birinchi seminar bolalarni o‘yin orqali o‘qitish, ularning qiziqishi va ijodiy tafakkurini rivojlantirishda pedagogning o‘rniga bag‘ishlandi.
Ikkinchi seminarda esa o‘quvchilarning mustaqil fikrlashi, savol berishi, tanlov qilishi va o‘z bilimini tahlil qilishiga imkon yaratadigan ta’lim yondashuvlari ko‘rib chiqildi.
Mashg‘ulotlar interaktiv shaklda o‘tkazilib, talabalar amaliy topshiriqlar va muhokamalarda faol ishtirok etdilar.
Mazkur tashrif KIUT va James Madison universiteti o‘rtasidagi akademik hamkorlik doirasida xalqaro pedagogik tajriba almashinuviga xizmat qildi.
