Жорий йилнинг 20 май куни Италиянинг Turin шаҳрида Politecnico di Torino (QS #243) базасида “Sustainable Transportation within the Framework of Green Deal” (SPHERE) халқаро лойиҳаси доирасида расмий учрашувлар бўлиб ўтди.
Унда Toshkent Kimyo Xalqaro Universiteti ректори профессор Akmal Baltayevich Allakuliev бошчилигидаги делегация иштирок этди.
Учрашувлар давомида барқарор транспорт тизимлари, “яшил” технологиялар, экологик муҳандислик ва транспорт соҳасини рақамлаштириш бўйича халқаро ҳамкорлик масалалари муҳокама қилинди. Шунингдек, SPHERE лойиҳасининг амалга ошириш жараёнлари, сифат назорати механизмлари ва стратегик ривожланиш йўналишлари юзасидан фикр алмашилди.
Politecnico di Torino Европанинг етакчи техник университетларидан бири бўлиб, муҳандислик, транспорт технологиялари, энергетика ва барқарор ривожланиш соҳаларида илғор илмий-тадқиқот ишларини амалга ошириб келмоқда.
Музокаралар доирасида:
— қўшма илмий-тадқиқот лойиҳаларини амалга ошириш;
— профессор-ўқитувчи ва талабалар алмашинувини йўлга қўйиш;
— академик мобиллик ва стажировка дастурларини кенгайтириш;
— халқаро грант ва инновацион лойиҳаларда ҳамкорлик қилиш;
— экологик мониторинг ва рақамли транспорт ечимлари бўйича қўшма ишланмаларни ривожлантириш масалалари кўриб чиқилди.
Учрашув якунида Toshkent Kimyo Xalqaro Universiteti ҳамда Politecnico di Torino ўртасида таълим, илм-фан ва инновациялар соҳасида ҳамкорликни мустаҳкамлаш мақсадида ўзаро англашув меморандумини (MoU) имзолаш бўйича келишувга эришилди.
