Toshkent Kimyo xalqaro universiteti talabalari uchun G‘alaba bog‘ida amaliyot o‘tash imkoniyati yaratiladi
2026-yil 5-noyabr kuni Toshkent Kimyo xalqaro universiteti va O‘zbekiston Respublikasi Mudofaa vazirligi huzuridagi “G‘alaba bog‘i” yodgorlik majmuasi o‘rtasida hamkorlik memorandumi imzolandi.
Endilikda universitet talabalari “G‘alaba bog‘i” yodgorlik majmuasida o‘quv va malaka amaliyotini o‘tashi, muzey ekspozitsiyalari, tarixiy hujjatlar va manbalardan ilmiy izlanishlarida foydalanishi mumkin bo‘ladi.
Hamkorlik doirasida majmua mutaxassislari universitetda ma’ruzalar, seminarlar va mahorat darslari o‘tkazadi. Shuningdek, ular talabalarning bitiruv malakaviy ishlari himoyasi va yakuniy attestatsiya jarayonlarida ham ishtirok etadi.
Memorandum qo‘shma ilmiy konferensiyalar, ko‘rgazmalar va tadqiqotlar tashkil etish, ilmiy maqolalar, kataloglar hamda o‘quv qo‘llanmalar tayyorlashni ham nazarda tutadi.
Hamkorlikning yana bir muhim jihati — talabalar muzeyshunoslik, arxivshunoslik va manbashunoslik bo‘yicha nazariy bilimlarini bevosita amaliyotda mustahkamlash imkoniyatiga ega bo‘ladi. Shuningdek, tomonlar bitiruvchilarning ish bilan bandligiga ko‘maklashish bo‘yicha ham hamkorlik qiladi.
