Ta’lim va amaliyot uyg‘unligi: “Art Engineering 2026” misolida
Kimyo International University in Tashkentda o‘tkazilgan Art Engineering 2026 ko‘rgazmasi oliy ta’lim tizimiga qo‘yilayotgan asosiy talab — bilimni amaliyot bilan uyg‘unlashtirish — amalda bajarilayotganini yaqqol ko‘rsatdi.
Ko‘rgazmaning ochilish marosimida Oliy ta’lim, fan va innovatsiyalar vaziri Kongratbay Avezimbetovich Sharipov ishtirok etib, ta’lim jarayonida yaratilayotgan bunday amaliy loyihalarning ahamiyatini alohida ta’kidladi.
Ekspozitsiyada muhandis yo‘nalishi talabalari tomonidan ishlab chiqilgan ishlanmalar taqdim etildi. Loyihalar ekologik muammolar, resurslardan oqilona foydalanish va zamonaviy texnologik yechimlarga bag‘ishlangan. Xususan, qayta ishlangan materiallar asosida yaratilgan art obyektlar, energiya samaradorligi va ekologik muvozanatga qaratilgan g‘oyalar namoyish etildi.
Mazkur ko‘rgazma shuni ko‘rsatadiki, bugungi talaba nafaqat nazariy bilim olmoqda, balki real muammolarga yechim taklif qila oladigan mutaxassis sifatida shakllanmoqda.
